ATHINË – Policia greke ka ndërmarrë një operacion të gjerë në zonën e Athinës, duke arrestuar të paktën 12 persona të dyshuar si pjesëtarë të dy bandave të dhunshme, të lidhura me tifozëri ekstreme sportive. Të arrestuarit akuzohen për një sërë veprash penale, përfshirë trafik droge, rrahje të organizuara, grabitje dhe zjarrvënie.

Sipas autoriteteve, personat e ndaluar janë anëtarë të grupeve ultra të futbollit, të cilët kanë qenë të përfshirë në përleshje të rënda me tifozë rivalë dhe aktivitete të rënda kriminale. Gjatë operacionit, policia ka sekuestruar edhe sasi të konsiderueshme droge dhe lëndë shpërthyese.

Ky aksion është pjesë e një fushate më të gjerë që nisi pas vrasjes së një efektivi policie në vitin 2023 gjatë përplasjeve me huliganë në kryeqytet, çka tronditi opinionin publik dhe vuri në alarm strukturat shtetërore për të frenuar dhunën që ka lidhje me botën e sportit.

Autoritetet greke kanë paralajmëruar se operacioni do të vijojë edhe në ditët në vijim, ndërsa pritet që së shpejti të bëhen publike emrat e të ndaluarve dhe akuzat konkrete ndaj secilit prej tyre. Policia e Shtetit grek ka bërë thirrje për bashkëpunim me qytetarët në luftën kundër dhunës dhe kriminalitetit të organizuar të lidhur me sportin.