Një goditje e fuqishme ndaj një rrjeti shqiptar të krimit të organizuar që merrej me trafik shumëtonësh kokaine dhe pastrim parash është finalizuar më 7 dhe 8 gusht 2025 në Shqipëri. Në kuadër të një operacioni të koordinuar ndërkombëtar, forcat e rendit shqiptare në bashkëpunim me Belgjikën, Francën, Gjermaninë, Italinë dhe Holandën arrestuan 10 persona dhe sekuestruan pasuri me vlerë disa milionë euro.

Hetimet, të mbështetura nga Europol, zbuluan se grupi kriminal kishte lidhje me organizata ndërkombëtare me ndikim të lartë në Evropë dhe merrej me dërgesa masive kokaine nga Amerika Latine në portet kryesore të BE-së, përfshirë Hamburgun dhe Roterdamin. Nga vetëm një prej dërgesave, drejtuesi kryesor kishte fituar më shumë se 40 milionë dollarë.

Pas arrestimit të Ervis Çelës, anëtar kyç i rrjetit dhe i shpallur në kërkim ndërkombëtar për vepra të rënda penale, u zhvilluan 15 bastisje gjatë të cilave u sekuestruan prona të ndryshme, përfshirë vila, resort turistik, automjete, biznese dhe shuma të mëdha parash në euro, dollarë dhe lekë.

Analiza e të dhënave të komunikimeve të enkriptuara nga platforma Sky EÇ, e cila vazhdon të japë rezultate edhe pas katër vitesh nga çmontimi, ishte një mjet kyç në hetim. Kjo platformë i lejoi autoriteteve të rindërtonin strukturën dhe rrjetin e bashkëpunëtorëve të këtij grupi.

Operacioni, i udhëhequr nga SPAK dhe i mbështetur nga ekspertët e Europolit, forcoi edhe më shumë bashkëpunimin ndërkombëtar në luftën kundër krimit të organizuar dhe trafikut të drogës.