Durrës – Një tjetër operacion i suksesshëm i Forcës së Posaçme Operacionale në bashkëpunim me Interpol Tiranën dhe Policinë e Durrësit çoi në arrestimin e Nikolla Llogos, 60 vjeç, i shpallur në kërkim ndërkombëtar nga autoritetet italiane për një nga krimet më të rëndë: marrëdhënie seksuale me dhunë me të mitur, konkretisht me vajzën e tij.

Operacioni i koduar “Operacionalja 46” u finalizua pas informacionit të siguruar nga strukturat e Policisë së Shtetit mbi vendndodhjen e Llogos në qytetin e Durrësit, ku ai ishte fshehur prej kohësh për t’iu shmangur drejtësisë italiane. Ai ishte dënuar nga Gjykata e Apelit në Bolonjë me 5 vjet e 10 muaj burgim për krimin e ndodhur në komunën Noceto, Itali.

Nikolla Llogo ishte shpallur në kërkim nga Interpol Roma më 23 maj 2025, ndërsa tashmë ndodhet në paraburgim në pritje të ekstradimit drejt Italisë, ku do të vuajë dënimin për aktin makabër të dhunës seksuale ndaj së bijës.

Ky arrestim vjen në kuadër të përpjekjeve të pandërprera të Policisë Shqiptare për të çmontuar strehimin e kriminelëve ndërkombëtarë në vendin tonë dhe për t’i dorëzuar ata drejtësisë së vendeve ku janë dënuar.