Policia e Shtetit njofton se vijojnë operacionet e njëpasnjëshme për kapjen e personave të shpallur në kërkim ndërkombëtar, në kuadër të veprimeve të Drejtorisë së Forcës së Posaçme Operacionale të DPPSh-së.

Gjatë 24 orëve të fundit janë finalizuar dy faza të tjera të operacionit policor të koduar “Operacionalja”, konkretisht fazat 78 dhe 79, si rezultat i të cilave janë arrestuar dy shtetas me qëllim ekstradimin drejt Kosovës.

Sipas njoftimit zyrtar, shërbimet e Policisë, bazuar në informacione të siguruara në rrugë operative, kanë organizuar dhe zhvilluar me sukses këto dy faza në qytetin e Tiranës, ku u kapën dhe u vunë në pranga shtetasit R. B. dhe G. H., banues në Tiranë.

Të dy këta persona ishin të shpallur në kërkim ndërkombëtar, pasi më 13 janar 2026, Përfaqësuesi Special i Sekretarit të Përgjithshëm të UNMIK në Kosovë ka lëshuar urdhër arresti ndërkombëtar ndaj tyre. Ata dyshohen për kryerjen e veprave penale “Pjesëmarrje ose organizim i grupit të strukturuar kriminal”, në fushën e trafikimit të qenieve njerëzore, sipas parashikimeve të Kodit Penal të Kosovës.

Shtetasit e arrestuar janë ndaluar me qëllim ekstradimin drejt autoriteteve kosovare, ndërsa Policia e Shtetit bën me dije se vijon puna për përfundimin e procedurave ligjore të ekstradimit.