Në një operacion të gjerë antidrogë në Tiranë, u godit një grup kriminal i shpërndarjes së lëndëve narkotike në shkolla dhe lokale nate në kryeqytet. Operacioni, i koduar “TEMPULLI 4,” rezultoi në arrestimin e 24 personave, ku 9 prej tyre ishin arrestuar më parë dhe 15 janë ndaluar ditën e sotme. Ende vazhdojnë kërkimet për 4 individë të tjerë të shpallur në kërkim.
Gjatë operacionit, policia sekuestroi një sasi të madhe lëndësh narkotike, përfshirë:
– 1.8 kg kokainë
– 18 kg marijuanë
– 350 doza të lëndës narkotike sintetike LCD dhe ekstazi
– Aparatet celulare dhe automjetet e të arrestuarve
Droga LCD është e veçantë për shkak se është në formë kartoni dhe përdoret duke u vendosur poshtë gjuhës, një metodë që mund të shkaktojë pasoja të rënda shëndetësore dhe deri në humbje jete.
Hetimet kanë zbuluar se ky grup shpërndante lëndë narkotike në afërsi të shkollave, lokale nate dhe ambiente të tjera të frekuentuara nga të rinjtë në Tiranë. Specialistët e Hetimit të Narkotikëve në DVP Tiranë, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Tiranë, po vijojnë veprimet për dokumentimin e plotë të kësaj veprimtarie kriminale dhe për ndjekjen ligjore të të tjerëve të përfshirë.
