Policia e Tiranës ka vënë në pranga një 22-vjeçar, i cili u kap në flagrancë duke lëvizur me armë zjarri në automjet, gjatë operacionit të koduar “Confirmation”, të zhvilluar nga shërbimet e Komisariatit të Policisë Nr. 6.

I arrestuari është E. B., 22 vjeç, banues në Tiranë. Ai u lokalizua dhe u ndalua nga patrullat e policisë në rrugën “Ilia Papanikolla” në zonën e Kombinatit.

Gjatë kontrollit të mjetit që ai drejtonte, efektivët gjetën në sedilje një armë zjarri pistoletë, e cila u sekuestrua së bashku me automjetin në cilësinë e provës materiale.

Sipas njoftimit zyrtar, operacioni u zhvillua mbi bazën e informacioneve operative për një person që qarkullonte i armatosur në zonë.

Materialet procedurale i janë kaluar Prokurorisë pranë Gjykatës së Shkallës së Parë Tiranë, për vijimin e hetimeve në ngarkim të 22-vjeçarit, i dyshuar për veprën penale “Armëmbajtje pa leje”.