Një operacion ndërkombëtar i koduar “Grimm” ka goditur një rrjet të sofistikuar kriminal, i cili përdorte të mitur të rekrutuar nga platformat online për të kryer vrasje me pagesë.

Sipas Europol, rreth 200 persona janë arrestuar në nëntë vende të Europës, ndërsa dhjetëra vrasje janë parandaluar në kohë. Hetimet zbuluan se fëmijët rekrutoheshin përmes rrjeteve sociale, aplikacioneve të mesazheve dhe platformave të lojërave si Fortnite, Counter-Strike dhe Discord, ku u ofroheshin para, “status” ose përfitime virtuale në këmbim të kryerjes së krimeve.

Një rast tronditës është ai i një 11-vjeçari suedez, i cili kishte pranuar të kryente një vrasje për 14 mijë dollarë, por u shpëtua në momentin e fundit nga policia.

Rrjeti kriminal funksiononte me një strukturë të mirëorganizuar në katër role:
• Nxitësit: Urdhëronin dhe financonin krimet nga jashtë vendit.
• Rekrutuesit: Joshin fëmijët përmes rrjeteve sociale dhe lojërave online.
• Koordinatorët: Siguronin armët dhe logjistikën.
• Ekzekutorët: Adoleshentë pa precedentë penalë që kryenin urdhrat.

Europol e ka përkufizuar këtë fenomen si “Violence-as-a-Service” (Dhuna si shërbim), i cili ka përmasa alarmante në Suedi, Holandë, Gjermani, Spanjë dhe vende të tjera. Vetëm në Suedi, mbi 1 700 të mitur nën 18 vjeç janë përfshirë në rrjete kriminale gjatë vitit 2024.

Operacioni ka shmangur dhjetëra krime të rënda, përfshirë vrasje të planifikuara, trafik armësh dhe sulme me eksplozivë. Në disa raste, të miturit ishin gati të udhëtonin jashtë vendit për të kryer krime me pagesë, të organizuar përmes Telegram-it dhe kanaleve të koduara me mijëra anëtarë.

Pas këtij operacioni, Europol dhe autoritetet suedeze kanë bërë thirrje ndaj gjigantëve të teknologjisë për kontroll më të rreptë dhe heqjen e përmbajtjeve të dhunshme nga platformat e tyre, për të parandaluar përfshirjen e të miturve në krime.