Agjentët e Drejtorisë së Policisë së Aragonit në Spanjë kanë arrestuar dy shtetas shqiptarë, 25 dhe 35 vjeç, si autorë të dyshuar të krimit të trafikut të drogës dhe mashtrimit me energjinë elektrike. Ky operacion filloi në nëntor, kur policia mori informacion për një magazinë droge në qytetin Cuarte de Huerva.

Hetimi zbuloi se brenda magazinës ishte krijuar një fabrikë e sofistikuar për kultivimin e marijuanës, e cila ishte modifikuar për të ofruar kushtet ideale për rritjen e bimëve. Dhomat e magazinës ishin të pajisura me sisteme për kontrollin e lagështisë, ajrit të kondicionuar, ventilim dhe ndriçim, që siguronin korrje të shumta gjatë vitit. Katër dhoma ishin të dedikuara për kultivimin e marijuanës, me bimë shumë të larta, disa prej të cilave kalonin dy metra gjatësi dhe ishin gati për të u mbledhur.

Përveç kultivimit të marijuanës, objekti ishte lidhur në mënyrë të paligjshme me furnizimin me energji elektrike, duke përdorur lidhje të sofistikuara për të evituar matjen e konsumit. Si pasojë, të arrestuarit akuzohen jo vetëm për kultivim dhe përpunim të marijuanës, por edhe për mashtrim me energjinë elektrike.

Pas kontrolleve në objekt, u sekuestruan mbi gjysmë ton bimë marijuanë. Dy të arrestuarit, të cilët ishin banorët e magazinës, u paraqitën për hetim në gjykatën e Zaragozës dhe u vendos ndalim të përkohshëm për ta.