Një 21-vjeçar është arrestuar në Durrës në kuadër të operacionit policor të koduar “Markat”, pas dyshimeve se kishte kryer disa vjedhje automjetesh në Durrës dhe Dibër.
I arrestuari është Klajdi Lleshi, banues në Bulqizë, i cili ishte shpallur më herët në kërkim nga Policia e Durrësit.

Sipas hetimeve paraprake, i riu dyshohet se ka vjedhur 4 automjete – një në fshatin Gjoricë të Bulqizës dhe tre në lagjet nr. 15 dhe nr. 17 të Durrësit – si dhe sende personale nga një automjet tjetër në të njëjtën zonë.

Kapja e 21-vjeçarit
Pasi ka vjedhur një automjet tip Benz në Gjoricë, i riu është larguar drejt Tiranës.
Shërbimet e Komisariatit nr. 4 në Tiranë, në bashkëpunim me Policinë e Durrësit dhe Bulqizës, kanë bërë të mundur bllokimin e mjetit dhe arrestimin e tij në flagrancë.

Nga kontrollet e kryera, Policia ka sekuestruar katër automjetet e vjedhura, të markave:
• Benz
• Toyota
• Volkswagen
• Ford Focus

Dyshohet për vjedhje të tjera
Hetuesit po verifikojnë lidhjen e të riut me vjedhje të tjera automjetesh, ndërsa sipas burimeve operative, mjetet dyshohet se përdoreshin për t’u shitur te persona me precedent penal, me qëllim kryerjen e veprave të rënda penale.

Materialet procedurale i janë referuar Prokurorisë së Durrësit për veprime të mëtejshme.