Policia e Tiranës ka vënë në pranga një tjetër të dyshuar në kuadër të operacionit policor të koduar “Metoda”, i cili ka në fokus goditjen e tentativave për trafikim armësh.

Specialistët për Hetimin e Krimeve të Komisariatit Nr. 3 arrestuan R. A., 20 vjeç, i shpallur më parë në kërkim. Hetimet tregojnë se ai, në bashkëpunim me J. S. dhe S. M. – të cilët u arrestuan një ditë më parë – tentuan të trafikonin një armë zjarri, të ndarë në pjesë dhe të fshehur brenda një televizori, me destinacion përfundimtar Mbretërinë e Bashkuar.

Në njoftimin zyrtar, Policia bën të ditur:

“Specialistët për Hetimin e Krimeve të Komisariatit Nr. 3 vunë në pranga shtetasin R. A., 20 vjeç, i shpallur në kërkim në kuadër të operacionit policor të koduar ‘Metoda’. Ky shtetas, në bashkëpunim me shtetasit J. S. dhe S. M. (të arrestuar ditën e djeshme), kanë tentuar të trafikojnë një armë zjarri, të cilën e kishin ndarë në pjesë dhe e kishin fshehur brenda një televizori, me qëllim dërgimin në Angli.”

Materialet procedurale iu referuan Prokurorisë së Tiranës, e cila po vijon hetimet për zbardhjen e plotë të këtij rasti.