Policia e Tepelenës, në bashkëpunim me Seksionin Operacional të DVP Gjirokastër, ka finalizuar me sukses operacionin policor të koduar “Nearby”, duke arrestuar tre të rinj të dyshuar për vjedhjen e një automjeti dhe posedim të lëndëve narkotike.

Sipas njoftimit zyrtar, operacioni u ndërmor pas hetimeve të drejtuara nga Prokuroria pranë Gjykatës së Shkallës së Parë të Juridiksionit të Përgjithshëm Gjirokastër, për zbardhjen e një vjedhjeje të ndodhur më 26 maj 2025.

Të arrestuarit janë:
• K. P., 24 vjeç
• F. H., 18 vjeç
• Një 17-vjeçar, të tre banues në Tepelenë

Hetimet kanë zbuluar se këta shtetas, në bashkëpunim me njëri-tjetrin, kanë vjedhur automjetin e shtetasit F. C., banues në Tepelenë, dhe më pas e kanë shitur në qytetin e Gjirokastrës. Automjeti i vjedhur është lokalizuar dhe sekuestruar nga forcat e rendit.

Gjatë kontrollit në automjetin e njërit prej të ndaluarve, konkretisht në mjetin e F. H., policia ka sekuestruar:
• Një sasi të vogël lënde narkotike të dyshuar Cannabis Sativa
• Dy grirëse për përpunimin e drogës
• Dy armë të ftohta (thika)

Materialet procedurale i janë referuar Prokurorisë për veprime të mëtejshme ligjore. Policia thekson se hetimet vazhdojnë për dokumentimin e plotë të veprimtarisë kriminale të të arrestuarve dhe për identifikimin e ndonjë bashkëpunëtori tjetër të mundshëm.