Policia e Shtetit ka vënë në pranga një 28-vjeçar të shpallur në kërkim ndërkombëtar nga autoritetet spanjolle, si pjesë e një sërë operacionesh të suksesshme të ndërmarra nga Drejtoria e Forcës së Posaçme Operacionale.

Operacioni i koduar “Operacionalja 45” u zhvillua në aksin rrugor “Vau i Dejës–Shkodër”, ku u kap shtetasi E. K., lindur në Shkodër, i cili rezulton i dënuar nga Gjykata e Barcelonës me masën e sigurisë “arrest në burg”, për veprat penale të kultivimit të bimëve narkotike me llamba dhe vjedhje të energjisë elektrike.

Arrestimi u realizua falë bashkëpunimit të ngushtë ndërmjet INTERPOL Tirana dhe INTERPOL Madrid, në kuadër të koordinimit të informacionit mes partnerëve ndërkombëtarë të rendit.

Policia shqiptare njofton se po punohet për finalizimin e procedurave të ekstradimit të 28-vjeçarit drejt Spanjës, ku do të përballet me drejtësinë për akuzat ndaj tij.