Policia e Fierit, në bashkëpunim me Prokurorinë e Rrethit Gjyqësor, ka ndërmarrë mbrëmjen e djeshme një operacion të bujshëm anti-korrupsion, i koduar “Parking”, që ka çuar në ekzekutimin e disa urdhër-arresteve ndaj zyrtarëve të lartë të bashkisë dhe tatimeve.

Në fokus të hetimeve ishte një skemë abuzimi me të ardhurat nga parkimi nëntokësor në qytetin e Fierit, ku mungesa e kasave fiskale dhe favorizimi i subjekteve private dyshohet se ka sjellë një dëm në buxhetin vendor prej afro 40 milionë lekësh.

Mes personave të ndaluar është edhe nënkryetarja e Bashkisë së Fierit, Adela Hysenaj, një emër i njohur për lidhjen e saj të ngushtë me kryebashkiakun Armando Subashi. Ajo është vënë në arrest shtëpie për veprat penale “Shpërdorim detyre” dhe “Ushtrim i ndikimit të paligjshëm ndaj personave që ushtrojnë funksione publike”.

Të tjerë zyrtarë të përfshirë në skandal janë:
• Vasil Ceku, drejtor në Drejtorinë Rajonale Tatimore Fier – në arrest shtëpie dhe pezullim nga detyra për “Shpërdorim detyre”.
• Anisa Cjapi, drejtoreshë e Taksave dhe Tarifave Vendore në Bashkinë Fier – pezullim nga detyra për “Shpërdorim detyre”.
• Martin Dodi, sekretar i përgjithshëm i Bashkisë Fier – pezullim nga funksionet publike dhe ndalim i daljes jashtë shtetit, për “Ushtrim të ndikimit të paligjshëm ndaj funksionarëve të tjerë”.

Sipas njoftimit zyrtar të Policisë së Fierit, këta zyrtarë kanë vepruar në kundërshtim me ligjin, duke i shkaktuar dëm të drejtpërdrejtë buxhetit të qytetit dhe duke favorizuar në mënyrë të padrejtë biznese të caktuara. Operacioni është rezultat i një hetimi disamujor të Seksionit për Hetimin e Krimeve Ekonomiko-Financiare, në bashkëpunim të ngushtë me prokurorinë lokale.

Operacioni “Parking” konsiderohet si një nga goditjet më të forta ndaj abuzimeve me fondet publike në qeverisjen vendore të Fierit dhe sinjalizon një qasje më të ashpër ndaj zyrtarëve që shkelin ligjin nën petkun e funksionarit publik.

Hetimet vijojnë.