Operacioni policor me emrin “Midnight 26”, i finalizuar nga specialistët për Hetimin e Trafiqeve të Paligjshme të DVP Korçë, ka çuar në arrestimin e një personi që kishte angazhuar transportin e kundërligjshëm të emigrantëve për kalim të kufijve, duke kërkuar pagesë për shërbimin.
Personi i kapur në flagrancë është një 38-vjeçar, i cili ishte duke transportuar 4 emigrantë me një automjet pa leje drejtimi.
Specializuar në këtë lloj trafiku, ai është kapur nga forcat e policisë gjatë një kontrolli rutinë.
Si pasojë e këtij operacioni, janë sekuestruar automjeti i përdorur për transport, 3 celularë dhe një sasi e vogël lënde narkotike, e dyshuar për të qenë cannabis sativa.
Njoftimi:
Specialistët për Hetimin e Trafiqeve të Paligjshme të DVP Korçë, në vijim të punës për goditjen e veprimtarisë kriminale të dhënies ndihmë shtetasve nga Vendet e Treta, kundrejt pagesës, me qëllim kalimin e paligjshëm të kufirit, drejt vendeve të BE-së, në bashkëpunim me Agjencinë e Mbikëqyrjes Policore Korçë-Elbasan, si dhe të mbështetur të informacionet e siguruara nga inteligjenca policore, organizuan dhe finalizuan operacionin policor të koduar “Midnight 26”.
Si rezultat i operacionit u arrestua në flagrancë shtetasi D. G., 38 vjeç, banues në fshatin Vishocicë, Devoll.
Shërbimet e Policisë ndaluan në dalje të qytetit të Pogradecit, automjetin tip “Benz” që drejtonte 38-vjeçari. Nga kontrolli në brendësi të automjetit, u panë 4 emigrantë të cilët po transportoheshin kundrejt pagesave, në mënyrë që të kalonin kufirin, ilegalisht.
Më tej, nga verifikimet dhe kontrollet e tjera, u konstatua se shtetasi D. G. e drejtonte automjetin, pa leje drejtimi, dhe se kishte me vete, një sasi të vogël lënde narkotike cannabis sativa.
Në cilësinë e provës materiale u sekuestruan automjeti me të cilin kryhej transportimi, 3 celularë dhe sasia e cannabisit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
