Policia e Vlorës ka finalizuar operacionin policor “Secret Flat”, duke goditur një rast të shfrytëzimit të prostitucionit me shtetase të huaja. Në pranga ka rënë një 28-vjeçar, ndërsa bashkëpunëtorja e tij, një 51-vjeçare kineze, është shpallur në kërkim.

Nga hetimet rezultoi se të dy kishin marrë me qira një apartament në lagjen “10 Korriku” në Vlorë, të cilin e kishin përshtatur për aktivitet të paligjshëm prostitucioni. Në këtë ambient, ata shfrytëzonin për prostitucion kundrejt pagesës tre shtetase kineze, të cilave u siguruan strehim dhe klientë.

Në vijim të veprimeve procedurale, janë referuar në Prokurori materialet për veprën penale “Prostitucioni” në ngarkim të tre shtetaseve të huaja, identitetet e të cilave janë H. G., B. A. dhe L. M.

Ndërkohë, 28-vjeçari i arrestuar është identifikuar si F. S., banues në Tiranë, ndërsa në kërkim është shpallur F. G., 51-vjeçare me kombësi kineze. Ata akuzohen për “Trafikim personash të rritur” dhe “Shfrytëzim për prostitucion”, të kryera në bashkëpunim.