Operacioni policor i koduar “Stolen Line” vijon në Tiranë, ku autoritetet kanë goditur një rast të trafikimit të automjeteve të vjedhura nga jashtë vendit.

Gjatë hetimeve janë sekuestruar katër automjete luksoze, me një vlerë të përllogaritur rreth 200 mijë euro. Sipas burimeve, njëri nga personat e përfshirë dyshohet se kishte sjellë në Shqipëri një mjet tip “Jeep” të vjedhur në Itali, me qëllim shitjen, ndërsa një tjetër kishte trafikuar një “Range Rover” të vjedhur në Shtetet e Bashkuara të Amerikës.

Në kuadër të këtij operacioni janë shpallur në kërkim edhe dy persona të tjerë, të cilët dyshohet se kanë trafikuar një automjet tip “BMW” të vjedhur në Gjermani dhe një “Seat Cupra” të vjedhur në Itali. Edhe këto mjete mendohet se do të hidheshin në tregun shqiptar.

Dy shtetas janë proceduar penalisht, ndërsa automjetet e sekuestruara janë marrë si prova materiale. Hetimet vijojnë për të zbardhur plotësisht rrjetin dhe për të identifikuar të gjithë personat e përfshirë në këtë aktivitet kriminal.