Një operacion i koduar “The Holder”, zhvilluar nga Komisariati i Policisë Nr. 4 në Tiranë, ka çuar në arrestimin e Saimir Allmuçës, 41 vjeç, si dhe në sekuestrimin e një arsenali të konsiderueshëm armësh dhe municionesh të ndryshme, përfshirë emblema të Policisë së Shtetit.

Allmuça u ndalua në Rrugën e Dibrës, ku gjatë kontrollit të automjetit të tij, forcat e policisë gjetën një thikë, çka çoi në shtrirjen e hetimeve dhe kontrolleve më të thelluara në banesën e tij.

Gjatë bastisjes në banesë, policia sekuestroi:
• Një pistoletë
• Një pushkë
• Municione të ndryshme
• Emblema të Policisë së Shtetit

Ende nuk është bërë e ditur qëllimi i posedimit të këtyre armëve dhe pajisjeve, ndërsa materialet procedurale janë referuar në Prokurorinë e Tiranës, që pritet të hetojë më tej për zbardhjen e plotë të këtij rasti.

Hetimet pritet të zbulojnë nëse Saimir Allmuça ka lidhje me ndonjë aktivitet kriminal apo grup të strukturuar, si dhe burimin e armëve dhe pajisjeve të sekuestruara.

Policia ka theksuar se operacione të tilla do të vijojnë me intensitet të shtuar, si pjesë e fushatës për çarmatosjen e elementëve kriminalë dhe garantimin e rendit publik në kryeqytet.