Operacioni policor i koduar “Transaksioni” ka finalizuar me sukses një tjetër goditje ndaj krimeve kibernetike. Drejtoria për Hetimin e Krimeve Kibernetike e DPPSh-së, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Tiranë, ka arrestuar shtetasin turk Ferhat Karakus, 41 vjeç, i dyshuar për kryerjen e transaksioneve të kundërligjshme me vlerë mbi 1 milion euro.

Karakus, në bashkëpunim me shtetas të tjerë, përdorte poset e biznesit të tij për të realizuar transaksione të paligjshme, duke përdorur një kartë të një shtetasi tjetër, i cili nuk ndodhej në Shqipëri në momentin e kryerjes së transaksionit. Këto veprime janë raportuar si mashtrime nga kompania “MasterCard”.

Policia e Shtetit, në bashkëpunim me agjencitë ligjzbatuese homologe, po punon për zbardhjen e të gjitha rrethanave të rastit dhe identifikimin e shtetasve të tjerë të dyshuar të përfshirë në këtë aktivitet të paligjshëm.