Një grup kriminal i cili merrej me shitjen e lëndëve narkotike në Kuçovë dhe Berat është goditur nga policia ditën e sotme. Në kuadër të operacionit ‘Vëzhgimi’ janë arrestuar 4 persona, mes tyre dhe një 18-vjeçar.
Në pranga kanë përfunduar: Jurgen Kollçaku, 23 vjeç, Gjergji Braha 26 vjeç, Kleo Doko, 18 vjeç dhe Sherif Isaj 19 vjeç.
Gjatë kontrolleve në banesat dhe automjetet e autorëve, u gjetën sasi lënde narkotike kanabisi, 2 thika dhe 1 përforcues grushti dhe municion luftarak.
Vijojnë veprimet hetimore me qëllim identifikimin dhe arrestimin e shtetasve të tjerë që mund të jenë të implikuar në këtë veprimtari kriminale.
Njoftimi i Policisë:
Finalizohet operacioni policor i koduar “Vëzhgimi”, pas një hetimi dymujor, me metoda proaktive, për dokumentimin dhe goditjen e veprimtarive kriminale në fushën e narkotikëve.
Goditet një grup kriminal që merrej me shitjen në doza të lëndës narkotike cannabis sativa, në zona të ndryshme të qyteteve Berat dhe Kuçovë.
Kapen dhe vihen në pranga 4 pjesëtarë të këtij grupi kriminal.
Gjenden dhe sekuestrohen sasi lënde narkotike cannabis sativa, armë të ftohta dhe municion luftarak.
Bazuar në informacionet e siguruara nga inteligjenca policore, për disa shtetas që vepronin në kuadrin e grupit kriminal, për të shitur doza të lëndës narkotike cannabis sativa, në zona të ndryshme të qarkut, specialistët e Seksionit për Hetimin e Narkotikëve të DVP Berat dhe ata të Komisariatit të Policisë Kuçovë, kanë iniciuar një procedim penal në Prokurorinë e Beratit, me qëllim dokumentimin e plotë ligjor të kësaj veprimtarie kriminale.
Si rezultat i një hetimi dymujor, me metoda proaktive, në kuadër të operacionit policor të koduar “Vëzhgimi”, u kapën dhe u vunë në pranga shtetasit J. K., 23 vjeç, Gj. B., 26 vjeç dhe K. D. 18 vjeç, të tre banues në Kuçovë, si dhe shtetasi Sh. I., 19 vjeç, banues në Berat.
Nga provat e siguruara nga ky operacion, Gjykata e Shkallës së Parë e Juridiksionit të Përgjithshëm Berat ka caktuar ndaj këtyre shtetasve, masën e sigurisë “Arrest në burg”, pasi dyshohet se vepronin në kuadrin e një grupi kriminal që merrej me shitjen në doza të lëndës narkotike cannabis sativa, në zona të ndryshme të qyteteve Berat dhe Kuçovë.
Gjatë kontrolleve në banesat dhe automjetet e këtyre shtetasve, u gjetën sasi lënde narkotike cannabis sativa, 3 armë të ftohta (2 thika dhe 1 përforcues grushti) dhe municion luftarak.
Vijojnë veprimet hetimore me qëllim identifikimin dhe arrestimin e shtetasve të tjerë që mund të jenë të implikuar në këtë veprimtari kriminale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme.
