Opozita ka njoftuar nisjen e një proteste kombëtare sot, e cilësuar si një akt mosbindjeje civile, që do të mbahet në kryeqytet. Sipas gazetarit Igli Çelmeta, leja për protestën është dhënë nga Policia e Shtetit për një periudhë prej katër orësh, nga ora 18:00 deri në 22:00. Ende nuk është e qartë nëse opozita do ta respektojë këtë afat apo nëse protesta do të zgjasë përtej këtij orari të përcaktuar.

Në mbledhjet e fundit të Kryesisë së Partisë Demokratike dhe Këshillit Kombëtar, është vendosur që protesta të organizohet në formën e një marshimi, pa një skenar të qartë të bërë publik deri më tani. Ajo pritet të fillojë me një grumbullim të mbështetësve të opozitës në sheshin “Skënderbej” dhe para selisë së PD-së, nga ku më pas do të marshojnë drejt Kryeministrisë. Nuk janë parashikuar fjalime në këtë fazë të protestës, por raportohet se më tej turma do të lëvizë dhe mund të bllokojë disa akse rrugore. Deri më tani, PD nuk ka dhënë asnjë njoftim zyrtar për këtë plan.

Protesta ka vënë në gatishmëri të lartë Policinë e Shtetit, e cila ka mobilizuar mbi 1500 forca policore, përfshirë ato të rendit, Forcat e Ndërhyrjes së Shpejtë (FNSH), njësinë e specializuar “Shqiponjat”, dhe forcat elitë RENEA. Në mbështetje të këtyre trupave do të jetë gjithashtu edhe Garda e Republikës, që është e përgatitur për të mbrojtur institucionet shtetërore gjatë protestës.