Sipas dosjes hetimore, Aurel Hoxhallari dyshohet se është personi që organizoi vrasjen e Devi Kasmit, rreth 4 vite më parë. Sipas dosjes hetimore, Aurel Hoxhallari, shtetasi grek dhe Elton Halipaj, kanë vepruar në kuadër të grupit të strukturuar kriminal, për të përgatitur dhe kryer vrasjen e Devi Kasmit.

Më tej, prokuroria pretendon se plani për vrasjen është përgatitur disa muaj para se të kryhej, ndërsa Aurel Hoxhallari, i cili dyshohet se është porositësi, njihej me Efthymious Efthymiu prej vitesh. Hoxhallari është takuar disa ditë para ngjarjes me Efthymiu-n dhe një tjetër shtetas grek, i cili është larguar nga Shqipëria para se të ndodhte vrasja. Pas disa ditësh vëzhgim të lëvizjeve të viktimës, Devi Kasmi, mbrëmjen e 29 janarit të vitit 2018, sipas prokurorisë, Efthymious Efthymiu, i ka bërë pritë Kasmit poshtë banesës së tij duke e qëlluar me armë zjarri dhe lënë të vdekur në vend. Sipas dosjes, ka qenë një furgon i bardhë, i cili ka marrë vrasësin pas atentatit dhe ky furgon është blerë nga Halipaj.

Sipas dëshmive, rezulton se ekzekutori ka qenë një person i vetëm në momentin kur u qëllua Kasmi dhe u largua me motor. Kamerat e sigurisë kanë fiksuar atentatorin me motor, që merret nga disa persona, disa metra më larg, përmes një furgoni tip “Benz”, ngjyrë e bardhë. Kamerat kanë fiksuar edhe targën e furgonit.
Prokurorët kanë mundur të identifikojnë më pas edhe pronarin e tij, që është një shtetas nga Fushë-Kruja. Ky i fundit është marrë në pyetje dhe ka deklaruar se e ka shitur furgonin për 4200 euro.

Ai ka treguar se shitja është bërë te një notere, më 17 janar dhe personat që e kanë kontaktuar, kanë qenë Elton Halipaj dhe Malvin Dinellari. Kjo ka qenë përcaktuese për hetuesit, për të zbuluar grupin dhe shtëpinë e Aurel Hoxhallarit, i cili dyshohet si organizator i atentatit, por që është ende në kërkim. Sipas tij, blerësi komunikonte me dikë tjetër në telefon për çmimin dhe në fund ranë dakord për ta kryer blerjen e furgonit kundrejt 4200 eurove. Nga dëshmia e pronarit të furgonit, rezulton se personi që ai ka takuar, ka qenë Elton Halipaj.

SPAK-u kërkoi burg për jetë për ekzekutorin e Kasmit, 35 vjet për bashkëpunëtorin.

Njoftimi i prokurorisë:

Prokuroria Kundër Krimit të Organizuar dhe Korrupsionit e njohur ndryshe si SPAK, ka dhënë dje pretencën ndaj ish-efektivit grek Ethimious Efthimiou dhe Elton Halipajt, të akuzuar për vrasjen e Devi Kasmit, në janar të 2018, në Tiranë.

SPAK-u kërkoi shpalljen fajtor dhe dënimin me burgim të përjetshëm të grekut, si dhe dënimin me 35 vite burg për Elton Halipajn. Në pretencën e dhënë mesditën e djeshme, SPAK-u i kërkoi gjykatës që ish-anëtarin e forcave speciale greke ta shpallë fajtor për 6 vepra penale, mes të cilave “Vrasje me paramendim për interes”, kryer në bashkëpunim në kuadër të grupit kriminal, për armëmbajtje, prodhim droge e “Grup i strukturuar kriminal”. Procesi ndaj ish efektivit grek dhe Halipajt ndodhet në fazën e konkluzioneve të mbrojtjes.

Seanca është caktuar të zhvillohet këtë të premte, në orën 10:00.

Në këtë seancë, pasi të japë konkluzionet mbrojtja, togat e zeza të GJKKO-së do të vendosin nëse do ta pranojnë apo jo kërkesën e prokurorisë për dënimin e Ethimious Efthimiou-t dhe Elton Halipajt.