Një hetim penal i nisur pas arrestimit të oficerit të policisë Edison Pema në Elbasan ka çuar në zbulimin e një rrjeti më të gjerë, ku rezultojnë të përfshirë 5 punonjës të tjerë policie dhe 1 qytetar, të dyshuar për aktivitet të paligjshëm të basteve sportive dhe shpërdorim detyre.

Edison Pema u arrestua në qershor të vitit 2025, pasi sipas hetimeve ai i kishte kërkuar në formë gjobe 10 mijë euro një shtetasi nga Kosova me inicialet E.S.. Sipas dosjes hetimore, qytetari kosovar nuk kishte mundur të siguronte shumën e kërkuar, ndërsa gjatë një takimi mes tyre, oficeri i policisë e kishte kërcënuar rëndë.

Në dosje përmendet se Pema i kishte vendosur pistoletën e shërbimit në brez dhe e kishte kërcënuar duke i thënë:
“…ose do paguash lekët, ose do bësh ngjarje për mua…ose unë do të vras, do të fus plumbin…”.

Gazetari Elton Qyno raporton se Edison Pema ndodhet aktualisht në burg, ndërsa nga analiza e telefonit të tij dhe përgjimet telefonike ka dalë në dritë një çështje e dytë penale. Në këtë dosje të re rezulton se disa punonjës policie janë të përfshirë në organizim të basteve sportive, lojëra fati, lloto të paligjshme, si dhe në shpërdorim detyre.

Si pasojë, Agjencia e Mbikëqyrjes Policore në bashkëpunim me Prokurorinë e Elbasanit kanë ndërmarrë 5 masa sigurimi ndaj punonjësve të policisë dhe 1 masë sigurimi ndaj një qytetari.

Personat ndaj të cilëve janë marrë masa sigurimi janë:
• Denis Sinani, shef i krimeve në Komisariatin e Devollit
• Ersit Dogra, trupë shërbimi operacional pranë Seksionit Special të Ndërhyrjes Taktike, njësia speciale RENEA
• Enea Kapllani, ndihmës specialist në Postën Kufitare Morinë
• Aldi Molla, përgjegjës turni pranë Stacionit Policor Morinë
• Gezim Beqiraj, ndihmës specialist dhe kontrollor në Pikën Kufitare Morinë
• Ilir Tafaj, qytetari që dyshohet se administronte lloton e paligjshme në Elbasan

Hetimet vijojnë për të dokumentuar plotësisht aktivitetin kriminal dhe për të përcaktuar shkallën e përgjegjësisë penale për secilin prej të dyshuarve.