Pak para protestës para Parlamentit, Kreu i PD Sali Berisha ka mbërritur në selinë blu. Berisha është shfaqur i buzëqeshur ndërsa ka përshëndetur edhe gazetarët me dy gishtat lart.

Protesta pritet të nis në orën 10:00 teksa njëkohësisht do të zhvillohet edhe seanca plenare. Sakaq rikujtojmë se Berisha bashkë me deputetin Flamur Noka janë përjashtuar me 10 ditë nga Kuvendi pasi bllokuan seancën ditën e hënë.

Ndërkohë për Belind Këlliçin dhe Edi Palokën është marrë vendimi që të përjashtohen nga 5 ditë.

Ky vendim vjen pas tensioneve dhe debateve në seancën e fundit plenare, ku jashtë Kuvendit u mbajt dhe një protestë e thirrur nga opozita. Kjo është hera e dytë që Berisha përjashtohet brenda një harku kohor të shkurtër nga Kuvendi, ndërsa PS e ka akuzuar atë për fyerje ndaj kryeparlamentares Lindita Nikolla dhe thyerje të rregullores.