Pallati Buckingham do të presë vitin e ardhshëm një ekspozitë të veçantë, e cila do të nxjerrë në pah gardërobën ikonike të Mbretëreshës Elizabeth II, pas 70 viteve të saj në fron.

Ekspozita, e titulluar “Queen Elizabeth II: Her Life in Style”, do të shfaqë rreth 200 veshje, gjysma e të cilave nuk janë ekspozuar kurrë më parë. Përveç rrobave, do të përfshihen edhe skica dhe shënime nga stilistët dhe vetë Mbretëresha.

Stilistët britanikë Erdem Moralioglu, Richard Quinn dhe Christopher Kane do të kontribuojnë në këtë ekspozitë, që do të hapet në Galerinë e Mbretit në Pallatin Buckingham në prill 2026.

Mes veshjeve të ekspozuara do të jenë:
• Fustani i kurorëzimit dhe ai i dasmës, të dizajnuar nga Norman Hartnell;
• Fustani i mbretëreshës në darkën shtetërore në Uashington, 1957, për presidentin Dwight D. Eisenhower;
• Veshje hipizmi, shallë karakteristikë dhe një pelerinë transparente plastike nga Hardy Amies, një dizajn “jashtëzakonisht modern për kohën”.

Kuratorja Caroline de Guitaut e përshkruan garderobën si “një leksion mjeshtëror në simbolizëm, prerje dhe mjeshtëri britanike”, ndërsa stilistët theksojnë ndikimin e saj të madh në modën britanike dhe në promovimin e kulturës së vendit në botë.

Ekspozita do të qëndrojë e hapur nga 10 prilli deri më 18 tetor 2026, ndërsa biletat do të dalin në shitje sot.