Një zjarr i fuqishëm ka përfshirë një pallat trekatësh në qendër të qytetit të Peshkopisë, rreth orës 02:00 të mëngjesit të sotëm, duke shkaktuar panik te banorët dhe dëme të konsiderueshme materiale.

Sipas informacioneve paraprake, flakët kanë shpërthyer fillimisht në katin e tretë të godinës dhe më pas janë përhapur me shpejtësi në të gjithë ndërtesën. Për shkak të distancës së vogël mes pallateve, rreziku për përhapjen e zjarrit ka qenë i madh, por evakuimi i menjëhershëm i banorëve ka shmangur tragjedinë.

Fatmirësisht, nuk raportohet për viktima apo të lënduar. Në vendngjarje kanë ndërhyrë forcat zjarrfikëse dhe policia, të cilat kanë arritur të vënë nën kontroll flakët pas disa orësh përpjekjesh.

Shkaqet e zjarrit mbeten ende të paqarta, por dyshimet e para janë se gjithçka mund të ketë nisur nga një shkëndijë elektrike. Ndërkohë, policia dhe ekspertët e shërbimit zjarrfikës po hetojnë për zbardhjen e plotë të rrethanave.