Papa Françesku u bëri thirrje rebelëve sirianë, që kanë përmbysur regjimin e presidentit Bashar al-Assad, të marrin përgjegjësi për stabilitetin dhe unitetin kombëtar të vendit. Gjatë një fjalimi në Vatikan, Papa theksoi rëndësinë e një qeverisjeje që promovon paqen dhe bashkëjetesën në Siri, duke kërkuar që të shmangen ndarjet dhe konfliktet e mëtejshme.

“Shpresoj që ata të gjejnë zgjidhje politike që të shmangin ndarjet dhe të promovojnë stabilitetin dhe unitetin e vendit me përgjegjësi,” deklaroi Papa. Këto ishin komentet e tij të para publike për Sirinë pas përmbysjes së Asadit.

Ai gjithashtu u bëri thirrje grupeve fetare të ndryshme të Sirisë të punojnë së bashku në frymën e respektit dhe miqësisë së ndërsjellë, për të kontribuar në të mirën e kombit dhe për të ndihmuar në rindërtimin e vendit të shkatërruar nga lufta civile.