Në një skenë prekëse në sheshin e Shën Pjetrit në Vatikan, Papa Françesku u shfaq sot me një karrocë me rrota për të përshëndetur besimtarët e mbledhur me brohoritje dhe duartrokitje në Ditën e Jubileut të të Sëmurëve dhe Botës së Shëndetësisë. Pavarësisht moshës 88-vjeçare dhe vështirësive fizike, Ati i Shenjtë dëshmoi edhe njëherë përkushtimin e tij ndaj njerëzve në nevojë, duke i dhënë kësaj dite një dimension edhe më të thellë shpirtëror dhe njerëzor.

“Në ditën e jubileut të të sëmurëve dhe botës së shëndetësisë, i lutem Zotit që kjo prekje e dashurisë së tij të arrijë tek ata që vuajnë dhe të inkurajojë ata që kujdesen për ta,” tha Papa, duke ngritur duart drejt turmës me përulësi dhe dashuri.

Në fjalën e tij, ai nuk harroi asheronjtë e heshtur të kujdesit shëndetësor — mjekët, infermierët dhe punonjësit e shëndetësisë — të cilët shpesh përballen me sfida të mëdha, kushte të vështira pune dhe herë pas here, edhe me forma të dhunës.

“Lutem edhe për mjekët, infermierët dhe punonjësit e shëndetësisë, të cilët jo gjithmonë ndihmohen të punojnë në kushte adekuate dhe ndonjëherë janë edhe viktima të agresionit,” theksoi Papa, duke sjellë në vëmendje vështirësitë që shoqërojnë shpesh sistemet shëndetësore në mbarë botën.

Prania e Papës në këtë ditë të veçantë, edhe pse me ndihmën e një karroce, u përjetua si një akt guximi dhe frymëzimi për miliona njerëz që përballen me sëmundje dhe vuajtje çdo ditë. Mesazhi i tij u prit me emocione të forta, duke risjellë në qendër të vëmendjes rëndësinë e kujdesit, solidaritetit dhe përkushtimit ndaj të sëmurëve dhe atyre që i shërbejnë atyre me përkushtim.