Vatikan – Ati i Shenjtë Papa Leoni XIV mbajti të hënën një audiencë historike me përfaqësues të Kishave të ndryshme dhe komuniteteve të feve botërore, duke theksuar rëndësinë e dialogut dhe vëllazërimit ndërfetar. Në fjalën e tij, Papa nënvizoi se marrëdhëniet ndërmjet Kishës Katolike dhe myslimanëve karakterizohen nga një përkushtim në rritje për bashkëpunim dhe respekt të ndërsjellë, duke vlerësuar besimin e përbashkët në Zotin e vetëm.

“Ky qëndrim i bazuar në respektin dhe lirinë e ndërgjegjes përfaqëson një themel të patundur për ndërtimin e urave ndërmjet bashkësive tona,” tha Papa Leoni XIV gjatë audiencës.

Në këtë takim me rëndësi ndërkombëtare mori pjesë edhe Kryegjyshi Botëror Bektashian, Haxhi Dede Baba Edmond Brahimaj, i cili u prit personalisht nga Ati i Shenjtë. Përveç tij, në Vatikan ishin të pranishëm edhe delegacione të komuniteteve hebraike, myslimane, hinduiste, budiste, sikh, zoroastriane dhe xhainiste.

Kryegjyshi Brahimaj kremtoi në këtë ditë të veçantë edhe 66-vjetorin e lindjes, duke marrë urime nga të gjithë pjesëmarrësit në Vatikan.

Ceremonia u shoqërua me pjesëmarrjen e shumë figurave ekumenike dhe përfaqësuesve të feve të ndryshme, të cilët dje morën pjesë në Meshën e përurimit të Papnisë së Leonit XIV.

Ky event nënvizon përpjekjet e vazhdueshme për promovimin e paqes dhe dialogut ndërfetar në arenën ndërkombëtare.