Autoritetet britanike kanë lëshuar paralajmërime për mot të keq dhe rrezik për përmbytje në të gjithë Anglinë, duke bërë thirrje që qytetarët të tregohen të kujdesshëm dhe të mbajnë nën vëzhgim zhvillimet e motit, pasi situata mund të përkeqësohet dhe të kthehet në një rrezik për jetën. Banorëve u është kërkuar të zhvendosen në zona më të sigurta dhe të shmangin qëndrimin në rajonet më të prekura nga përmbytjet dhe reshjet e shumta.

Për shkak të kushteve të vështira të motit, disa rrugë kryesore janë mbyllur dhe aeroportet janë prekur gjithashtu nga këto ndryshime ekstreme të motit. Aeroporti i Bristolit ka pezulluar fluturimet përkohësisht, ndërsa Aeroporti i Aberdeen ka ndërprerë gjithashtu fluturimet për shkak të kushteve të vështira, duke përfshirë borën dhe akullin që kanë bllokuar pista.

Ekipet e emergjencës kanë punuar për pastrimin e borës dhe akullit në aeroportet e prekura, dhe pas disa orësh, Aeroporti i Mançesterit ka rihapur dy pistat e tij, ndërsa Aeroporti i Bristolit ka rifilluar fluturimet. Autoritetet vazhdojnë të monitorojnë situatën dhe bëjnë thirrje për kujdes dhe përgatitje të qytetarëve për çdo mundësi përkeqësimi të motit.