Parashqevi Simaku, një nga zërat më të dashur të muzikës shqiptare, po rikthehet sërish në vëmendjen e publikut jo vetëm me jetën e saj të re, por edhe me pasionin për këngën.

Pasi kaloi një periudhë të vështirë, ajo tashmë është vendosur në një apartament komod dhe vazhdon të këndojë me po të njëjtën energji dhe dashuri për muzikën si dikur.

Një javë më parë, ajo publikoi një projekt të ri muzikor, ndërsa biznesmeni Elton Ilirjani ka ndarë disa video ku Parashqevi Simaku performon në një atmosferë të ngrohtë.

Në një nga videot e publikuara në InstaStory, këngëtarja dëgjohet duke interpretuar këngën “Ky Marak” gjatë festës së ditëlindjes së Fadil Berishës, fotografit të njohur shqiptar në Amerikë.

Elton Ilirjani, duke treguar mbështetjen e tij për këngëtaren, ka shkruar krahas videos:

“Krenare për ty ‘Mama’, Nëna ime është më e mirë se e jotja.”

Ky rikthim muzikor i Simakut ka emocionuar fansat e saj, të cilët e kanë pritur gjithmonë me dashuri artisten që ka lënë një gjurmë të veçantë në muzikën shqiptare.