Sekretarja për Marrëdhëniet me Publikun të Partisë së Lirisë, Arla Merja, ka kritikuar ashpër qeverinë Rama, duke e akuzuar se ka braktisur pensionistët shqiptarë, duke i lënë në një mjerim të thellë ekonomik dhe shoqëror.

“Sipas të dhënave më të fundit, hendeku mes pensioneve dhe pagave është zgjeruar në mënyrë dramatike. Shkalla e zëvendësimit të pensioneve urbane ka rënë nga 37,6% në vitin 2020 në vetëm 31,2% në vitin 2024, ndërsa për zonat rurale ajo ka zbritur nga 35,7% në 29,7%, një nivel që për herë të parë ka rënë nën 30%,” deklaroi Merja.

Ajo e konsideroi këtë situatë si “krim social dhe një turp kombëtar”, duke shtuar se qeveria nuk ka ndërtuar strategji afatgjata për pleqërimin e shëndetshëm dhe dinjitoz, por i mban pensionistët peng të politikave elektorale, me shpërndarje ndihmash të vogla vetëm para zgjedhjeve.

Partia e Lirisë premton se pensionistët do të jenë në qendër të programit të saj politik, me fokus tek:
• Rritja e menjëhershme dhe e ndjeshme e pensioneve, me qëllim që pensioni mesatar të afrohet me pagën mesatare.
• Indeksim real dhe automatik të pensioneve.
• Reformim tërësor të sistemit të pensioneve për ta bërë të qëndrueshëm dhe të drejtë.
• Mbështetje të veçantë për pensionistët në shëndetësi dhe shërbime sociale, duke garantuar një pleqëri me dinjitet.

“Ne i themi qartë Edi Ramës dhe qeverisë së tij: mjaft u tallët me pensionistët! Ata nuk janë numra për propagandën tuaj, por qytetarë që kanë sakrifikuar për këtë vend. Varfërimi i tyre është dëshmi e paaftësisë dhe papërgjegjshmërisë së qeverisë që prej 12 vitesh nuk ka bërë asgjë për ta ndryshuar këtë realitet,” përfundoi Arla Merja.