Kreu i Partisë së Lirisë, Ilir Meta, ka deklaruar një premtim të ri për fermerët shqiptarë, duke ofruar mbështetje financiare me një pagesë direkte prej 200 euro për çdo kokë lopë. Meta e ka bërë këtë njoftim përmes një videoje të postuar në rrjetet sociale, ku theksoi se ky është një angazhim konkret për përmirësimin e mirëqenies së fermerëve dhe për zhvillimin e ekonomisë shqiptare.

Në deklaratën e tij, Meta u shpreh:

“Partia e Lirisë do të mbështesë me pagesë direkte fermerët me 200 euro për çdo kokë lopë. Ky nuk është një premtim, por një angazhim, jo vetëm për t’i dhënë fund shpopullimit të Shqipërisë por njëkohësisht për ta shndërruar mundin dhe sakrificën e fermerëve shqiptarë në mirëqenie të sigurt për ta dhe në një rritje e zhvillim për ekonominë shqiptare. Bujqësia është prioriteti ynë kryesor!”

Ky premtim synon të ndihmojë në përballimin e sfidave të fermerëve dhe të nxisë një zhvillim më të qëndrueshëm në sektorin e bujqësisë në Shqipëri.