Tiranë – Java e 15-të e Kategorisë Superiore solli një përballje vendimtare për ekipet kryeqytetase, ku Partizani fitoi derbin ndaj Tiranës me shifrat 2-0 në stadiumin “Air Albania”. Fitore kjo që i jep skuadrës së kuqe shpresa për një vend në “Final Four”, ndërsa Tirana mbetet në krizë të thellë, duke zbritur në vend të fundit në renditje.

Ndeshja nisi me intensitet të lartë, por golin e avantazhit e shënoi Partizani që në pjesën e parë. Pas një goditjeje këndi, Hjumën gjeti rrjetën e Tafas, duke i dhënë ekipit të kuq epërsinë 1-0. Tirana provoi të reagojë, por mungesa e finalizimit dhe kriza e përgjithshme në lojë i penguan të konkretizonte rastet.

Në pjesën e dytë, Skuka ndryshoi ritmin e ndeshjes për Partizanin dhe realizoi golin vendimtar në minutën e 66-të, duke vulosur fitoren 2-0 dhe shuar shpresat e Tiranës për një rezultat pozitiv. Tirana, që ka pësuar 29 gola në 15 ndeshje dhe ka vetëm 11 gola të shënuar, përjeton një krizë të thellë dhe rrezikon seriozisht rënien nga kategoria.

Ndërkohë, Partizani ngjitet në vend të 6-të me 20 pikë, duke mbajtur gjallë shpresat për një vend në zonën e “Final Four” dhe për një përfshirje të mundshme në garat europiane.