Të tjera detaje janë zbardhur në lidhje me arrestimin e Eria Agos, partneres së Safet Bajrit, e dyshuar për përfshirje në vrasjen e Fatbardh Licit. Sipas burimeve, ajo u arrestua më 26 shkurt, pesë ditë pas kapjes së Bajrit, dhe aktualisht ndodhet në burgun e grave në Pogradec.

Eria Ago akuzohet për përkrahjen e autorit të krimit dhe për dijeni mbi ekzekutimin e Fatbardh Licit, i cili u vra në vitin 2018 në lagjen Kiras, pranë banesës së tij. Arrestimi i saj është rezultat i hetimeve të SPAK dhe Policisë së Shtetit, të cilat e kanë konsideruar një person me rëndësi për zbardhjen e kësaj ngjarjeje të rëndë.

Por emri i saj nuk është i panjohur për drejtësinë shqiptare. Ago ka qenë më parë e përfshirë në dosjen e Hermes Nikajt, i njohur si “Zogu i Tiranës”. Në vitin 2020, emri i saj doli në përgjimet e një rrjeti prostitucioni, ku ajo përmendej si një nga protagonistet e mesazheve të shkëmbyera përmes Nikajt.

Në atë kohë, Ago mohoi akuzat, duke i cilësuar si shpifje për të dëmtuar figurën e saj. Ajo theksonte se nuk kishte asnjë lidhje me çështjen dhe se nuk kishte nevojë për para.

Arrestimi i saj për vrasjen e Licit hap një tjetër kapitull në hetimet mbi grupet kriminale në Shqipëri, ndërsa pritet që organet e drejtësisë të hedhin më shumë dritë mbi rolin e saj në këtë ngjarje të bujshme.