Politika shqiptare ndodhet sot në heshtje zgjedhore, pas një muaji fushate elektorale për zgjedhjet parlamentare të 25 prillit.

Fushata u mbyll me mitingje në Vlorë nga socialistët dhe në Tiranë nga demokratët.

24 orët e fundit përpara se t’u drejtohen kutive do u shërbejë qytetarëve shqiptarë për të kristalizuar dhe vendosur se kë do të mbështesin me votë ditën e diel.

Kodi Zgjedhor i Shqipërisë në nenin 77 të saj parashikon që në periudhën e heshtjes zgjedhore nuk lejohet asnjë lloj fushate nëpërmjet organeve të medias, si dhe zhvillimi i mitingjeve ose i veprimtarive të tjera zgjedhore të subjekteve zgjedhore.

Kodi parashikon gjithashtu gjoba për subjektet apo kandidatët që thyejnë heshtjen zgjedhore, por edhe për mediat.

Kështu, subjekti që thyen heshtjen zgjedhore, sipas nenit 77 të këtij Kodi, gjobitet nga KZQ-ja me 500 000 lekë. Po sipas këtij neni të Kodit me2 000 000 lekë gjobiten edhe botuesit apo operatorët radiotelevizivë.

Ndërkohë, ditën e nesërme, 25 prill, shqiptarët do iu drejtohen kutive të votimit, që prej orëve të mëngjesit, e deri në mbrëmje, për të zgjedhur qeverinë e re, që do t’i drejtojë për katër vitet e ardhshme.

Zgjedhjet parlamentare të këtij viti zhvillohen në kushte pandemie, ku çdo votues do t’i nënshtrohet një protokolli të rreptë për parandalimin e përhapjes së COVID-19, ku mbajtja e maskës dhe distanca janë të detyrueshme, ndërsa nuk do të lejohen të votojnë personat e infektuar me virusin e rrezikshëm.

Nga ana e saj, Policia e shtetit garantoi marrjen e masave për mbarëvajtjen e procesit zgjedhor. Edhe përfaqësuesit e misioneve diplomatike në Shqipëri gjatë gjithë muajt të fushatës zgjedhore, ju kanë bërë thirrje qytetarëve që të ushtrojnë të drejtën e tyre për të votuar.