Dhjetëra mijëra pasagjerë kanë mbetur të bllokuar në Emiratet e Bashkuara Arabe pas përshkallëzimit të konfliktit që përfshin Iranin dhe është përhapur në rajonin e Gjirit. Mbyllja e aeroporteve kryesore ka shkaktuar kaos në udhëtime, ndërsa një pjesë e udhëtarëve po kërkojnë alternativa të kushtueshme për t’u larguar.

Sipas revistës Forbes, disa pasagjerë po paguajnë deri në 200 mijë euro për fluturime private luksoze drejt Evropës, duke u nisur nga aeroporte që konsiderohen më të sigurta nga rreziku i sulmeve iraniane.

Kërkesa për fluturime “charter” ka shpërthyer pasi aeroportet kryesore në Dubai, Abu Dhabi dhe Doha u mbyllën pas nisjes së konfliktit fundjavën e kaluar. Situata ka lënë mijëra udhëtarë në pritje të paqartë, ndërsa kompanitë ajrore kanë pezulluar ose ridrejtuar fluturimet.

Për të shmangur bllokadën ajrore, shumë persona po udhëtojnë me tokë drejt Muscat – rreth katër orë larg me makinë – ose drejt Riyadh, një udhëtim që zgjat më shumë se dhjetë orë. Nga këto qytete, ata po sigurojnë vende në fluturime komerciale ose charter, të cilat aktualisht kushtojnë shumëfishin e çmimeve të zakonshme.

Ekspertët e industrisë së aviacionit theksojnë se tarifat e larta nuk lidhen thjesht me spekulime tregu, por me mungesën e avionëve të disponueshëm, rritjen e kostove operative dhe rreziqet e shtuara të fluturimit në një rajon të tensionuar nga konflikti.