Kryetari i Kuvendit, Niko Peleshi, ka uruar sot të gjithë shqiptarët në Ditën e Pavarësisë së Shqipërisë, duke theksuar rëndësinë e trashëgimisë së themeluesve dhe angazhimin për një Shqipëri europiane.

“Nga faqet që shkruajnë historinë, te dita që na bashkon të gjithëve! Dokumentet themeluese të shtetit shqiptar mbeten busulla jonë historike, duke na kujtuar se liria dhe shtetësia jonë nisën pikërisht nga këto faqe që i dhanë formë Shqipërisë,” u shpreh Peleshi në mesazhin e tij solemn.

Kryetari i Kuvendit publikoi gjithashtu një video simbolike ku shfaqet libri me Aktet Themeluese të Shtetit Shqiptar 1912-1922, duke rikujtuar momentet kyçe të shtetformimit dhe rëndësinë e dokumenteve historike si udhërrëfyes për brezat e rinj.

Peleshi theksoi se kjo ditë është një mundësi për të reflektuar mbi vizionin e themeluesve dhe për të riafirmuar angazhimin për një Shqipëri të lirë, sovrane dhe europiane.