Partia Demokratike ka hedhur akuza të forta ndaj Partisë Socialiste për “abuzim me fondet publike” dhe “konflikt interesi” në Bashkinë e Cërrikut, duke iu referuar marrëdhënieve të dyshuara mes ish-kryebashkiakut Andis Salla dhe kandidatit socialist Florenc Doka.

Në një deklaratë për mediat, zëdhënësja e Antikorrupsionit në PD, Genta Vangjeli, tha se pas marrjes së detyrës nga Salla, kompania familjare e Florenc Dokës, e regjistruar në vitin 2022, ka përfituar kontrata të shumta nga Bashkia Cërrik për blerje pajisjesh, orendish dhe organizim eventesh.

Sipas të dhënave të publikuara në spending data, kompania “Melius” sh.p.k. është përzgjedhur si fituese në disa procedura prokurimi nga vetë bashkia.

Po ashtu, në dhjetor të vitit 2023, bashkia shpalli fitues të ankandit për dhënien në përdorim të fondit pyjor “Mollas” pikërisht kompaninë në pronësi të Dokës, për një vlerë kontrate prej vetëm 600 euro në vit.

“Ky është vizioni i shpallur për zhvillimin e Bashkisë Cërrik sipas Partisë Socialiste: përfitime private në emër të zhvillimit publik”, u shpreh Vangjeli, duke shtuar se qytetarët duhet të vendosin nëse duan të përfaqësohen nga një person që “ka përfituar fonde publike për biznesin e tij privat dhe po promovohet si ‘njeriu i duhur’ për qytetin”.

Deklarata vjen pak ditë pas fjalës së ministrit Andis Salla në një takim elektoral në kinemanë e Cërrikut, ku ai u shpreh se “Florenc Doka është njeriu i duhur për Cërrikun”.

Zgjedhjet lokale në këtë bashki do të zhvillohen më 9 nëntor 2025, dhe sipas PD-së, ato do të jenë “një test për të ndalur modelin e klientelizmit dhe abuzimit me paratë publike”.