TIRANË – Partia Demokratike, në koalicion me Aleancën për Shpresë dhe Mundësi (PD-ASHM), ka paraqitur zyrtarisht një ankesë pranë Komisionit të Ankimimeve dhe Sanksioneve (KAS), duke kërkuar shfuqizimin e rezultatit të zgjedhjeve në Qarkun Fier, të mbajtura më 11 maj 2025. Ky është qarku i radhës që i shtohet listës së kontestimeve të opozitës ndaj procesit zgjedhor.

Në një deklaratë për shtyp, PD theksoi se zgjedhjet nuk kanë qenë të lira, të ndershme dhe të barabarta, duke e cilësuar procesin në Fier si një “farsë elektorale të dirigjuar nga shteti dhe mbështetur nga elementë kriminalë”.

Pretendimet e opozitës: administratë e politizuar, blerje votash dhe presion mbi votuesit

Sipas ankimimit zyrtar të paraqitur pranë KAS-it, demokratët pretendojnë se institucionet publike janë keqpërdorur si mekanizëm elektoral nga partia në pushtet, ndërsa në shumë raste janë dokumentuar përfshirje të drejtpërdrejtë të zyrtarëve shtetërorë në fushatë dhe në skema për blerje votash.

“Administrata publike dhe lokale është përdorur në mënyrë masive për t’i shërbyer fushatës së partisë në pushtet, duke eliminuar çdo konkurrencë reale”, thuhet në dokumentin e PD-ASHM.

Opozita ka denoncuar gjithashtu raste të angazhimit të grupeve kriminale, të cilët – sipas saj – kanë bllokuar rrugë, kanë patrulluar në zona urbane dhe rurale dhe kanë ushtruar presion mbi votuesit, shpeshherë në mënyrë të drejtpërdrejtë mbi individë dhe familje.

Raporti i OSBE-ODIHR: shqetësime të forta për intimidim dhe përdorim të burimeve shtetërore

PD mbështet pretendimet e saj edhe në raportin paraprak të OSBE-ODIHR, të publikuar më 12 maj 2025, ku theksohet se në Qarkun Fier janë vërejtur:
1. Intimidim dhe presion mbi votuesit, përmes deklaratave dhe veprimeve të zyrtarëve vendorë.
2. Përdorimi i burimeve shtetërore në mënyrë klienteliste, përfshirë shpërndarjen e ndihmave sociale dhe investime të fokusuara në mënyrë të dyshimtë.

“Këto fenomene deformojnë thellësisht vullnetin e zgjedhësve dhe e zhveshin procesin nga çdo standard demokratik”, deklaron PD-ASHM.

Votimi nga jashtë, një tjetër pikë e fortë kontestuese

Në ankesë, PD-ASHM ngre shqetësimin se votimi nga jashtë vendit, ndonëse një e drejtë kushtetuese e diasporës, është përdorur si instrument manipulimi zgjedhor.

“KQZ nuk ka vënë në dispozicion asnjë provë që të faktojë se zarfi i votës i është dorëzuar personalisht qytetarit emigrant. Kjo sjell dyshime të mëdha për vlefshmërinë e këtij procesi”, thuhet në padinë drejtuar KAS-it.

Kërkesa zyrtare në KAS

PD-ASHM i kërkon Komisionit të Ankimimeve dhe Sanksioneve:
• Të shfuqizojë vendimin e KQZ-së për miratimin e rezultatit në Qarkun Fier (Vendimi nr. 1317, datë 23.05.2025).
• Të shpallë të pavlefshëm rezultatin zgjedhor në këtë qark për shkak të parregullsive masive.
• Të urdhërojë përsëritjen e procesit zgjedhor në zona të caktuara ose në të gjithë qarkun, në varësi të konstatimeve të KAS-it.