Partia Demokratike i ka drejtuar një kërkesë zyrtare Komisionit Qendror të Zgjedhjeve (KQZ) për të vënë në dispozicion pamjet filmike të të gjitha qendrave të votimit në vend, si dhe informacion të detajuar mbi kthimin e zarfeve të votave të diasporës, përfshirë mënyrën se si janë dorëzuar – dorazi apo jashtë sistemit zyrtar të shpërndarjes me DHL.

Sipas burimeve, në dijeni të kësaj kërkese është vendosur edhe misioni i OSBE/ODIHR, ndërsa PD ka bashkëngjitur edhe një ankesë për kryetarin e KQZ-së, Ilirjan Celibashi, duke e akuzuar se nuk i ka vënë në dispozicion materialet e kërkuara, pavarësisht kërkesave të përsëritura.

Në ankesë theksohet gjithashtu se në shumë prej materialeve të siguruara pamjet filmike kanë prerje të qëllimshme, duke u ndërprerë pikërisht në momentet kritike të procesit të numërimit të votave.

Kërkesa zyrtare është dorëzuar nga përfaqësuesi ligjor i PD-së, Franc Nuri, dhe tashmë pritet shqyrtimi nga ana e Komisionit Qendror të Zgjedhjeve, nëse do të bëhet transparencë për këto elementë të rëndësishëm të procesit zgjedhor.

Partia Demokratike kërkon hetim të plotë mbi integritetin e procesit, sidomos në lidhje me sigurinë dhe transparencën e votës së emigrantëve dhe garancinë që duhet të ofrojë sistemi i monitorimit me kamera në qendrat e votimit.