Një moment humoristik ndodhi në përfundim të takimit të kryeministrit Edi Rama me qytetarët e Korçës, ku një pensioniste e pranishme nuk e kurseu vlerësimin për kreun e qeverisë. Teksa e përgëzonte Ramën për punën e tij dhe atë të qeverisë në qytet, pensionistja përdori fjalë që dikur ishin përdorur për Enver Hoxhën, duke shkaktuar të qeshura.

“Jemi shumë krenarë për shokun Edi Rama!” – tha ajo, ndërsa kryeministri reagoi me humor: “Tani me këtë që bëre, do të të ngrenë, do të të ulin patronazhiste. S’ka problem!”

Pensionistja vazhdoi të fliste për kontributin e saj të gjatë në Parti dhe ndjenjën e saj të përkatësisë, duke përmendur se ka mbi 50 vite punë dhe se ende vijon rrugën e partisë, ndërsa Rama e ndërpreu me humor, duke e pyetur për mendimin e saj mbi pensionet.

“E di ça po mendoj tani?” – tha Rama me të qeshur. “Kur këta që nuk na mundin dot dëgjojnë njerëz si ti, tmerrohen sepse thonë: ‘Obobo, ku ka Zot që i kthen këta!’.”

Pensionistja iu përgjigj me krenari: “Ne të çmendur nuk jemi! Ne jemi të edukuar, të respektuar dhe e duam popullin shqiptar pa dallim feje e ideje. Sot e kemi jetën… Jemi shokë të vjetër, kemi punuar që nga Niko Pandeli…”

Rama i kujtoi me buzëqeshje edhe ministrin aktual Niko Peleshi, duke mbyllur takimin mes të qeshurave dhe atmosferës së ngrohtë në sallë.