Kryeministri Edi Rama u pyet sot në Prishtinë për raportin me Presidentin e Serbisë Aleksandër Vuçiç. Duke iu drejtuar kritikëve të Kosovës, Rama tha se “për ta ai është vllau i Vuqiqit”, ndërsa shtoi më tej se marrëdhënia që ka me Albin Kurtin është tepër miqësore.

“Për të ardhur tek pro serbizmi im, unë jam vëllau i Vuiqiqit…ju e dini këtë dhe e keni bërë status timin që unë jam vëllau i tij.

Por përtej kësaj, këndvështrimi im është se ne nuk na duhet një Serbi e radikalizuar aq më tepër në kontekstin e sotëm.

E na duhet të bëjmë çmos të rrisim të gjitha ato mundësi që e integrojnë këtë pjesë të Evropës që jo pa arsye është më e prapambetura historikisht ë një nivel tjetër ndërveprimi ekonomik dhe shoqëror. Unë nuk hyj në administrimin e dialogut mes Kosovës dhe Serbisë.

Nuk hyj në çështjen e administrimit të dialogut Serbi-Kosovë, është çështje ekskluzive e atyre që Kosova ka zgjedhur, si kundër nuk besoj që qasja jonë e ndryshme ndaj Serbisë dëmton qasjen apo qëllimin përfundimtar. Janë dy rrugë të ndryshme drejt të njëjtit qëllim, njohja e Kosovës nga Serbia dhe paqja e drejtë që i takon shqiptarëve të Kosovës, gjithë rajonit, tha Rama.

Ndërkohë për raportet me kryeministrin Albin Kurti, Rama tha se “ne kemi një marrëdhënie të kahershme që është shumë miqësore e do jetë e tillë gjithmonë”.

Në këtë pikë ne jemi të qetë dhe këtë e tregon fakti që po të jeni kur ne jemi bashkë e të shikoni volumin e qeshjeve dhe auto ironisë që na bashkon reciprokisht mbase do habiteni e do thoni që ky nuk qenka vëllai i Vuqiqit, ky qenka vëllau i Albinit. Më leni të rri vëllai i të dyve se mund t’ju duhem në të ardhmen”