Vajzat 15-vjeçare shqiptare janë klasifikuar si problematike nga dega evropiane e Organizatës Botërore të Shëndetësisë (OBSH) për kohën e gjatë që kalojnë në internet dhe rrjetet sociale. Ky përfundim vjen nga një studim anketues i kryer me fëmijë të moshës 11, 13 dhe 15 vjeç nga 44 vende të ndryshme.

“Shqipëria ka dalë me një rezultat problematik sa i përket përdorimit të medias nga të rinjtë. Vajzat 15-vjeçare janë renditur të katërtat në Evropë për përdorimin problematik të medias, me 1 në 4 vajza që ka raportuar se kalon mbi 4 orë në ditë në internet,” tha Genta Qirjako.

Adoleshentët shqiptarë gjithashtu kryesojnë në kontaktimin e miqve online, duke u renditur të parët për kontaktet e vazhdueshme në internet me miq të ngushtë dhe të tjerë.

“Vërehet një prevalencë e lartë e kontakteve të vazhdueshme online me miq në Shqipëri dhe Portugali,” shtoi Qirjako.

Studimi nënvizon se varësia nga rrjetet sociale po dëmton rëndë shëndetin mendor të të rinjve dhe performancën e tyre akademike, ndërsa rekomandon ndërhyrje nga prindërit për të ndihmuar në uljen e varësisë.

“Përdorimi i zgjatur i rrjeteve sociale ndikon negativisht në shëndetin mendor dhe social të të rinjve, duke i vendosur ata në rrezik për sjellje të padëshiruara,” përfundoi Qirjako. Studimi përfshiu 280 mijë të rinj, me gjetje që ndryshojnë sipas gjinisë.