Tiranë – Sot përfundon afati i regjistrimit të emigrantëve për pjesëmarrjen në zgjedhjet parlamentare të 11 majit 2025, një proces i cili ka tërhequr një interes të madh nga diaspora shqiptare.

Sipas të dhënave zyrtare të Komisionit Qendror të Zgjedhjeve (KQZ), deri më tani janë regjistruar 284,114 aplikime, prej të cilave janë miratuar 225,797, ndërsa 42,009 janë refuzuar.

Afat i ri për aplikantët e refuzuar

KQZ ka miratuar një shtyrje të kufizuar të afatit të regjistrimit vetëm për shtetasit shqiptarë që janë regjistruar si të refuzuar në sistem. Kjo u bë me qëllim korrigjimin e mangësive në aplikimet e tyre dhe për t’u dhënë një mundësi të fundit për të siguruar pjesëmarrjen në votime.

Ky vendim u mor duke marrë parasysh se:
Këta shtetas i janë përgjigjur thirrjes për regjistrim brenda afatit të mëparshëm.
Janë në një numër të konsiderueshëm (42,000).
Kanë një llogari të hapur në sistem dhe u është njohur e drejta e riaplikimit.

Shtyrja e afatit me disa ditë pritet të ndihmojë emigrantët të korrigjojnë të dhënat e tyre dhe të sigurojnë përfshirjen në listat e votuesve për zgjedhjet e 11 majit.

KQZ pritet të japë udhëzime të mëtejshme për mënyrën se si do të procedohet me aplikimet e refuzuara, ndërsa procesi i përgatitjeve për zgjedhjet parlamentare po hyn në fazën përfundimtare.