Specialisti i sigurisë, Ergys Muzhaqi, ka bërë komente në një intervistë televizive në lidhje me rastin e Azgan Mërnicës, të riut 23-vjeçar i cili vrau efektivin e “Shqiponjave”, Novruz Cenaliaj. Muzhaqi tha se përkëdhelja më shumë se ç’duhet e fëmijëve po sjellë pasoja të rënda në shoqëri.

Ai vuri në dukje se, megjithëse mosha 23-vjeçare ende është një moshë ku i riu nuk është maturuar, është problematike fakti se atij gjërat i duken normale. Muzhaqi theksoi se një nga arsyet për këtë sjellje problematike është mos njohja e një autoriteti dhe përkëdhelia e tepruar, duke shtuar se kjo sjellje nuk është vetëm e Azganit, por edhe e vëllait të tij.

“Ne për këta fëmijë jetojmë, është një shprehje që më çudit personalisht. Si jetohet vetëm për fëmijët, ne kemi fëmijët, kemi prindërit, kemi veten. Kemi lezetet dhe sikletet e jetës ashtu si vijnë. Nuk duhet të kufizohemi vetëm te fëmijët, se rrezikojmë dhe kemi kaluar në fakt në një përkëdheli të tepruar të këtij brezi. Nga mosha 13-23 vite, akoma nuk mund të quhet i rritur, i pjekur dhe i maturuar personi, sidomos për gjininë mashkullore, se femrat piqen disi më herët. Një njeri që ka kaluar 10 vite në mosnjohje autoriteti. ai ka pasur edhe vëllain problematik, edhe vetë ka qenë problematik, atij i duken gjërat normale. Përtej pjesës që ne nuk e dimë se çfarë ka ndodhur akoma aty, por unë e kam si brez”,-tha Muzhaqi.