Koreja e Jugut po përballet me një situatë të rënduar për shkak të shirave të rrëmbyeshëm që kanë goditur vendin për të katërtën ditë me radhë, duke shkaktuar viktima, dëme të mëdha materiale dhe evakuime masive.

Sipas autoriteteve koreano-jugore, katër persona kanë humbur jetën deri më tani si pasojë e motit të keq, ndërsa dy të tjerë rezultojnë ende të zhdukur. Shirat intensive kanë shkaktuar përmbytje dhe rrëshqitje dheu në disa rajone, duke vënë në rrezik jetën e qytetarëve dhe duke detyruar autoritetet të shpallin alarme emergjente.

Ministria e Brendshme raportoi se deri në orën 06:00 të mëngjesit, sipas orës lokale, 2,816 qytetarë nuk mund të kthehen ende në shtëpitë e tyre, ndërsa numri total i të evakuuarve gjatë ditëve të fundit ka shkuar mbi 7,000.

Agjencia meteorologjike e vendit ka paralajmëruar se reshjet do të vijojnë deri të hënën në disa zona, duke rritur më tej rrezikun për rrëshqitje dheu dhe përmbytje të tjera.

Autoritetet janë në gatishmëri të plotë, ndërsa punonjës të emergjencave civile dhe ekipe shpëtimi po punojnë në terren për të ndihmuar banorët dhe për të minimizuar pasojat e motit ekstrem.