Policia e Tiranës ka vënë sot në pranga 24 vjeçarin me iniciale A.T pasi ka përplasur një vajzë me makinën e tij tip “Benz” dhe është larguar nga vendngjarja.
Sipas njoftimit zyrtar të policisë, e aksidentuar ka mbetur shtetasja K.S 26 vjeçe e cila po kalonte rrugën në momentin që është përplasur.
Mësohet se në vendngjarje kanë mbërritur forcat policore dhe pas disa orësh punë intensive bënë të mundur identifikimin dhe kapjen e autorit të dyshuar, ndërsa e reja është në spital jashtë rrezikut për jetën.
Njoftimi i policisë:
Tiranë
Aksidentoi 26-vjeçaren dhe u largua nga vendi i ngjarjes, Policia Rrugore e Tiranës, pas disa orësh pune intensive hetimore profesionale, identifikoi dhe vuri në pranga autorin.
Specialistët e Qarkullimit Rrugor bënë arrestimin në flagrancë të shtetasit A. T., 24 vjeç, për veprat penale “Shkelja e rregullave të qarkullimit rrugor” dhe “Largimi nga vendi i aksidentit” pasi në rrugën “Shahin Doçi”, ka aksidentuar shtetasen K. S., 26 vjeçe, këmbësore, dhe më pas është larguar nga vendi i ngjarjes, për të fshehur automjetin. 26-vjeçarja ndodhet në spital, jashtë rrezikut për jetën.
Shërbimet e Policisë Rrugore të Tiranës, pas marrjes së njoftimit, menjëherë organizuan punën për identifikimin dhe kapjen e autorit të dyshuar. Pas disa orësh pune intensive hetimore profesionale bënë të mundur identifikimin e targës së automjetit dhe më pas të drejtuesit të mjetit.
Shërbimet e Policisë kanë bllokuar në cilësinë e provës materiale automjetin tip “Benz”.
Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme procedurale.
