Një aksident i rëndë hekurudhor ka ndodhur në Greqi në orët e para të së mërkurës.

Të paktën 38 persona kanë humbur jetën dhe 85 të tjerë janë plagosur, ku shumë prej tyre janë në gjendje të rëndë, pasi një tren pasagjerësh është përplasur me një tren mallrash. Aksidenti ndodhi në qytezën Tempe 380 kilometra në veri të Athinës.

Shumë vagona treni dolën nga shinat dhe të paktën tre prej tyre morën flakë.

Autoritetet bëjnë me dije se në qytetin e afërt të Larisës të paktën 25 persona nga 53 që u shtruan në spital kishin lëndime të rënda.

Pasagjerët që morën lëndime të lehta u transportuan me autobus për në Selanik. Në trenin e pasagjerëve ndodheshin 350 udhëtarë.