Në prag të zgjedhjeve të 11 majit, tensionet brenda Partisë Demokratike janë rritur ndjeshëm. Sekretari i Përgjithshëm i PD-së, Flamur Noka, ka reaguar ashpër ndaj deklaratave të drejtuesit politik të Tiranës, Belind Këlliçi, i cili së fundmi është shprehur se Sali Berisha nuk po kandidon për të qenë kryeministri i ardhshëm i vendit.

Në një emision televiziv, Noka e cilësoi këtë deklaratë si një “lapsus” ose një keqinterpretim të qëndrimit të Berishës, duke lënë të kuptohet se çdo tentativë për të zbehur figurën e liderit historik të PD-së është e papranueshme. “Në rastin më të mirë është lapsus, në rastin më të keq një tentativë për të sfiduar autoritetin e Berishës”, u shpreh Noka, duke theksuar se PD ka një proces të qartë dhe demokratik për zgjedhjen e kandidatit për kryeministër, nëpërmjet primareve të brendshme.

Nga ana tjetër, Belind Këlliçi ka mbajtur qëndrimin e tij, duke theksuar se Berisha nuk ka ambicie personale për të marrë drejtimin e qeverisë, por është rikthyer në politikë me një mision për të larguar Edi Ramën dhe qeverinë aktuale. Sipas Këlliçit, zgjedhja e kandidatit për kryeministër do t’i lihet demokratëve përmes një procesi primar.

Përplasjes i është shtuar edhe ndërhyrja e Klevis Balliut, kandidat për deputet në Tiranë, i cili rikujtoi se statuti i PD-së parashikon zhvillimin e primareve për të përcaktuar kandidatin për kryeministër. “Është një proces kokë më kokë, ku fiton vetëm një person,” theksoi Balliu.

Zërat për ndasi të reja brenda PD-së po intensifikohen, duke ngritur pikëpyetje serioze mbi unitetin e partisë në një moment vendimtar për opozitën shqiptare. Nuk përjashtohet mundësia që këto tensione të thellohen pas përfundimit të zgjedhjeve, ku priten zhvillime të rëndësishme në skenën politike të demokratëve.