Protesta kombëtare e thirrur nga Partia Demokratike ka nisur me tensione në orën 18:30, ku militantët e PD-së janë përplasur me policinë dhe kanë hedhur molotove drejt godinës së Kryeministrisë. Protesta, e paralajmëruar nga kryetari i PD-së, u cilësua si fillimi i një mosbindjeje civile që, sipas opozitës, do të vijojë deri në krijimin e një qeverie teknike dhe largimin e kryeministrit Edi Rama.

Deputetët e PD-së, së bashku me militantët, janë vendosur para Kryeministrisë, ndërsa forcat e policisë janë angazhuar për ruajtjen e rendit. Protestës i janë bashkuar edhe përfaqësues të Partisë së Lirisë, PDBNJ-së dhe PDK-së.

Policia ka blinduar zonat kryesore, përfshirë Kryeministrinë dhe Kryesinë e Kuvendit, ndërsa në terren janë stacionuar forcat e FNSH-së dhe autobote për çdo situatë emergjente. Në total, mbi 1000 efektivë janë të angazhuar për të garantuar sigurinë e protestës.

Partia Demokratike kishte kërkuar leje për tubim deri në orën 22:00, por pa zbuluar itinerarin e saktë që do të ndiqet. Ndërkohë, kreu i PD-së, Sali Berisha, po ndjek protestën nga shtëpia, pasi ndodhet në arrest shtëpiak për akuzën e korrupsionit pasiv lidhur me privatizimin e kompleksit “Partizani”.